قم يا قصيدي زيّن الليل مسراه
وجه النهار اقفى بنوره ظلامه
قم لاعدمتك وانت معنى المواساه
وانت الرفيق الي يعزّي مقامـه
من عاد باقي غير انا وانت والآه
وليلٍ سرى ليله .. وحـرّم منامه
ياليل وان حدّيت مثلي الى اقصاه
قله خذ البرقع .. وهـات العمامه
والله لـ اعدّي نايف الجرح .. وارقاه
واحكم لجـام الصبر .. واركب سنامه
ماهذي اول هم عمري .. ولا اتلاه
ياطول ماعضّيت كـف النـدامـه
كم لي وانا يكتبنـي الحـزن وامحـاه
وكم لي وانا احمل فوق صدري وسامه
ولي صاحبٍ ما جابن البيض حليـاه
رجلٍ على ماقيل .. يسوى عظامـه
يازين طبعـه قبـل هذي ومحـلاه
ليته تجنّب .. مـا يقـل احترامـه
وياصاحبـي مانيب جاهـل تخطّـاه
مثلي يموت .. ولاتمـوت الكرامـه
من طاب لي .. يبشر بطيبي ويلقـاه
ومن راح .. مالحقتـه عبـاة الملامه
يزعل علي الحر .. وامـدح سجايـاه
ويرضى علي الخبل .. وافهم مرامـه
ماكـل شقٍ سلك وابـره ونرفـاه
ولاكل سودا يا ابيض الوجه شامه
من راح ياعلّ السلامـه تقفّـاه
حقه على ماقيـل .. لامه بلامه
غلطان كانه يحسب إنّا خسرناه
حمامةٍ طارت .. بدلهـا حمامه
وش عاد وان غره بنا طيب مجناه
الخشم لـو ينسى.. تعلاه هـامـه
له عزةٍ ترفع عن القاع ماطـاه
ولي عزةٍ مانزلتنـي مقـامـه
اليوم كلٍ شرهته حـدّ يمنـاه
لابوه طيب .. ولعنبوها شهامه