لاتنشغل فيني أنا بحالي ادرى
قلبٍ تعلّق فيك .. ينسى مع الوقت
اكثرمن اللي صارلي .. ويش يجرى ؟
بين الرجـا والياس .. فكري تعلّقت
مثلي ولوشفته عن همومه ازرى
ماقال ليتك في جروحه ترفقت
هاك القصايد لاتضايقت واقرى
شف وشكثر فيها لبسماتك اشتقت
أثرالوفا ينباع عندك ويشرى
ماكنت اصدق فيك .. واليوم صدّقت
يامشتهي فرقا المواليف حذرى
تبعد وأنا من سكرة الحب مافقت
لاطافت الفرصه تحريت الاخرى
وتروح .. ماكني عليها تشوّقت
ساري لو إن الليل مافيه قمرى
اشيل من حمل الهوى فوق ماطقت
لاصار حظٍ أقشر .. والايام قشرى
مافيه احد عاقل يلومك إليا ضقت
صحيح بعض الناس .. فرقاه بُشرى
وبعض البشر .. لاغاب لحظه تضايقت
ليتك خذيت بليل الاحباب مسرى
غرّبت من كثر الطواري وشرّقت
السيل يبقاله على القاع مجرى
ويبقالك التذكار.. لوكنت فارقت
اشوفلك من وين مارحت ذكرى
لاشفتها صدّيت عنها .. ودنّقت
ماكل جـرحٍ لاخـذا أيـام يبـرى
بعض الجروح يزيد شرّه مع الوقت