{......... أكَثـرُ مـِنْ حُـــبْ .. - الصفحة 6

السديم · #51 (**permalink**) 18-01-2009, 00:46

ماهيّ جديدهـ و عادتك ..

كثر الحكي منك و الصمت منيّ ..
كثر الصراخ منك و الاستماع منيّ ..

أنتظر تنتهي ..
و اجمع الحكيّ ..
أبي أوضح لك المعنى ..
و أجبر الصدق يتفشى ..

ترفع يدك ..
تسكتنيّ ..

وهذي عادتك ..
تولع سيجارتك ..
و تنفثنيّ ..

.

السديم · #52 (**permalink**) 27-01-2009, 02:03

.

لن أكتبك حُباً أو شوقاً أو حتى حنيناً إلى مابين يديك ..
سَـ أتغاضى عنك .. و سَـ أجربُ تعاليك ..
حتى لا أتصلُ بك .. أقفلتُ جهازيّ .. و تظاهرتُ بِـ أن بطاريتهُ شارفت
على الإنتهاء ..
هذهِ المرهـ .. سَـ أنجح .. و سَـ تُؤمنُ أنت بِـ أنيّ امرأة مُستبدة ..
لا تهتمُ بك و لا تتبعُ عواطفهَا ..
و هذهِ المرهـ فقط .. سَـ أجرب خضوعكْ .. لِـ تُمسك جوالك .. و تتصل بيّ
سَـ تجد هاتفيّ مُقفل .. و سَـ تنتظرُ سويعاتٍ .. تتصل .. و مقفل أيضاً ..
حتى أعفيّ عنيّ من ذلك السجن و أتلهفُ مجدداً .. أهاتفك .. ترد عليّ
بنبرة غضب :" لمَ هاتفكِ مقفل" .. لِـ يكون جوابيّ ودون كذب " يؤ ..انتهت بطاريتهُ "

: )

.

السديم · #53 (**permalink**) 12-02-2009, 00:32

.

كانوا بحكيهم يضحكون .. و بسوالف ورا بعضها تنَبهوا لِـ وجودي ..
وتعمدوا يجيبون طاريك..
كنت ألتفت بعيد عنهم ..
كأني مو معهم ..
و أحاول ألتهي بغيرك ..
الريق بداخلي جف و أنا أسمع حروف أسمك تبلل نطقهم..
تعرف لمن تبيّ تحكي أي أحد بوقت ماعندك إلا الواحد الأحد تلجأ له ..
وهم بنفس الوقت تبي تبين لهم أنك مو مهتم أو الأمر عادي ..
أسمعهم و أفهم مقاصدهم .. أصيح بداخلي والله حرام
هاللي تسوونه فيني .. ليه تعذبوني بطواريه ..

و ينادونيّ فجأه بعد هالصمت اللي أحدثته بنظرهـ تحكي كلمه وحدهـ "بَسْكُم عاد"
يتداركون الموقف ..

-ماعلقتي بشيء عنه ..
-عن مين ..!
-عن .... ولد ...
-أيه شنو فيه
-شنو فيه ..!
-أيه مافهمت قصدكم .. قلتوا عنه شيء ..
-أحلفي ياشيخه ..
-مادري والله ..لكن اللي أعرفه أنيّ ماكنت معاكم ..

ياقلبه .. لا تفضح واقعي وياك ..
ياقلبه .. أحاول أكتم السر بداخلي لأجل أحفظك ليّ و لأجل أتمتم
هالوجود بلحظات أعيشها وحديّ ..
ياقلبه .. أمانه عليك بحكيهم ماكنت معك .. و بسؤالهم ماكنت معك ..
وبِـ بداية نظراتهم ماكنت معك ..
ياقلبه .. شف لهم حلّ خلهم ينسون أمري و أنا معك ..
ياقلبه .. أرفض هالفضول اللي يعشعش بقلوبهم .. إلاّ يبون يعرفون شنو بينّا ..
ياقلبه .. لاتتركنيّ أبد وياهم ..

.

السديم · #54 (**permalink**) 12-03-2009, 16:44

.

يطالعهَا .. أهيّ قدامه .. هادية و جالسَة
تقلبّ بِـ السيديات .. تدور لها أغنيّة تسرح معاها ..
تدور لها مشَاعِر تفهم مشاعرها و تحكِيهَا ..

أدريّ فيها تبيّ تنبهه أنه مو لِـ وحدهـ .. و ان أهيّ
تحس بِـ نبضات قلبه وتحتريهِ ..
أنثى الصَمت تترك البِداية له .. كل البِداية منه ..

دخانه بين أصبعيه ..
يدعي عساني أحترق قبل لا يجيب طاريهِ ..

قهوته قدام عينيهِ ..
تحاول تذّوب زجاج الطَاولة و تختلط بكسور كوبَهَا ..

يبتسم .. يبتسم .. و أهي بجوهَا تبحث عن أغانيه
الصَاخبة فيها و السَاكنة فيه .. تحسسه أنها ماتعيش
واقعه و بدون مايشعر تستوطن خياله ..

لقتهَا .. و بِـ أصَابعها كانت تضغط على زر يوقظ تَرانيمه ..

يابرود ملامحه و يَاشغب داخله ..
تطالعه ..
تعرف عادته..

دايم يهمس لها "أحبك " بين رشفة قهوته و أكسجين دخانه ..!

.

السديم · #55 (**permalink**) 14-06-2009, 02:07

.

*

كنت وماتَزال تلك الأغنية التيّ أستمعُ إليها و أغمضُ عينايّ عليهَا لِـ تصل نشوتها
إلى حيثُ قلبيّ المُشتاق .. و أطمأن إلى كلام بين أوتارهَا .. و حيثُ الظلام الذي
أعيشهُ أتخيلك أنت واقفاً أماميّ .. تبتسمُ طويلاً .. و تفتحُ يديك لِـ تحتضن حبيّ ..
أعلم أن أحلام اليقظة سَاحاتُ أحلامٍ تُريدُ أن تنتقل إلى الواقع .. لكن أحلاميّ ليست كذلك ..
أحلاميّ تُريدك أنت فقط .. مهما كان الثَمن ومهما كانت الليالي مُجحفةٌ بِـ حقهَا ..
ياحبيبي .. و ياحبيبي .. أقولهَا و اليَقين يَعيشُنيّ أن لا أحد يسمع ذلك النداء الخفيّ
سِوى مشاعريّ لِـ تنهض و يُصيبني الأرق كل المسَاء .. فلا أُعاود الإغفاء و أقوم
إلى سِراجٍ عانق الغُبار .. فَـ أراك تلتقطُ الأنفاس و تتبعثر مع صَوتيّ المنحنيّ ..
فوق سجادةٍ من صُوف .. فَـ أتغطى بها و أتذكر الأماكن الدافئة معك ..
أرقصُ و أغنيّ و لا أفكر إلاّ بحكاياك و قصصٌ كَـ رواياتِ الأطفال و عوائلهم
حول نارٍ يحلقُ شُعاعها بين أحرفهم الصَادقة ..
في الغياب و الإشتياق .. حريّةٌ تُنهكنيّ كثيراً لأنك لست معيّ .. و لأننيّ أُنثاك ..
سَـ أظل أتخيلك عاريةَ من كُل شَيء و سَـ أفتح نوافذ غرفتيّ حتى تَرميّ بحبلك
متى ماعُدت و تتسلق وحدتيّ ..

.

السديم · #56 (**permalink**) 15-06-2009, 01:31

.

كنت أفكر فيه شويّ ..
بس شويّ ..
يمكن اللي مايتعدى شوقيّ و لحظه وصاله ..
و أنّا جالسة .. و بيديّ الجوال ..
أسألنيّ /
أتصل .. لا لا .. يجوز مشغول بهالوقت ..
أرسل رساله .. لا لا .. وبقعد أنتظر الرد ..
يووهـ ..
طيب أخليهِ براحته .. أليّا راق دق ..
لا لا .. صعب عليّ شوقيّ ينتظر كل هالوقت ..
و أنتبه لِـ شاشتيّ و أشوف ضوء اتصاله ..
و أرد أسأل نفسي ..
أرد .. لا لا .. يجوز يبي يسمع "آلو " و يقفل ..
و أنا اللي أبي أسمع صوته .. بخليّه شويّ ..
و أخليّه يحس بِـ لوعة الشوق ..
و أخليهِ يسأل ذاته .. ليه ماترد ..
فيها شيء .. !
و يسترجع آخر مكالمة ..
و الأيام اللي فقدته..
أخليهِ ينشغل بالتفكير ..
مثل اللي سواهـ فيني و زود ..
بس حرام ماتسوى عليه ..
آآهـ منك ياقلب .. ماتتحمل لو شويّ ..
بس خله شويّ ..
يفكر فيك و في مقدراك ..
و يفكر لو فارقك بيوم شنو راح يطريّ بباله ..
خله ../
يعد أخطائه ..
و يندم على زلاته ..
و يرجع لك ملهوف ويبيك ..
أفهمك ياقلب و أفهم مقصدك ..
و أنه ما تسوى عليه يعيش كل هالظلم ..
بس أبيه يراجع حساباته ..
و أبيه بعد يدقق بعواطفه ..
أبي أكون أنا تفكيرهـ و أنا حياته ..
أبيه مايشوف غيري ..
ولا يحس بغيري ..
و لا يدور على غيري ..
أبي أكون أنا سعدهـ ..
و همه ..
أعرفك بتقول مو عادتك ..
طيب ما يجوز لي أتغلى عليه ياقلب ..
و أخليه يحاكيّ شوي .. تكفى ياقلب ..
بس شوي ..
و ياخســارهـ ..
كل هذا كان مايتعدى التفكير و الرد على اتصاله ..

.

السديم · #57 (**permalink**) 29-06-2009, 15:00

.

مسَافر ..
و ليه السفر يالغالي ..!
يعنيّ ../خلاص نويّت ..
طيب تعال قرب أبي حضنك الدافيّ ..
أبي أجمع أحساسيّ بداخلك ..
ولا أقولك ..
لا تقرب ..
خلك بعيّد ..
و خلنيّ بالحلم أزورك ..
تدري أقدرهـ ..
و تدريّ أنك بالحلم سهل لو أبيّك..
أيه يالمسَافر ..
رحلتك ماهي لوحدك ..
رحلتك تعنيّ بشنطتك ..
روحي .. وقلبيّ .. وتفكيريّ ..
يالمسَافر ..
أنا مابي غيرك ..
بنتظر هنا ..
بقلب الريَاض ..
ساعة وصولك ..
و غلاتك ..
بفرش هالرياض ورد بحضورك ..
و أجمع تراب الوطن بين يديني و أخليك تشمه ..
لأن أكيد الوطن واحشك ..
و لأن الوطن فيه بقايا قلب حبّك ..
تدري يالمسَافر ..
لا ماراح أسويّ شيء .. /حتى بجيّتك ..
علشان ماتحس أنك غبت كثير ..
و أن كل هاللي صار بسبب فقدتك ..
بخلي الأرض زي ماهيّ ..
بحاول قد ما أقدر ما أطالع الساعة بوقت حضورك ..
راح أبيّن لك أن روحتك كانت دقايق ..
وبرجعتك كل شيء ثابت ..
عاجبك كذا ..!
يالمسَافر ..
الفكر تعبنيّ ..
يالمسَافر ..
ما عاد أقوى غيبتك ..
بوجودك وغيابك و رجوعك ألف و ألف فكرهـ ..
تدريّ ..
شنو أبيّ بهاللحظة ..
أبي الأرض اللي عانقت موطاك تنتبه لك .. /تكون خايفه عليك ..
تدريّ مايهمنيّ .. خلها تحبك .. خلها تموت .. فيك ..
صدقنيّ ما أغار ..
و خل السماء اللي تستنشق هواك تذوب مع أنفاسك ..
و هم صدقنيّ ما أغار ..
لا تقول أكذب ..
و ألعب على نفسيّ بهالكلام .. /بس شسويّ ..!
ياخيّ أفهمها ..
أشتاقتلك روحي ..
أشتاقلك قلبيّ ..
أشتاقلك فكريّ ..
كنت أبيك تاخذهم معاك ..
ماكنت أحتاجهم دامنيّ مو معاك ..
صرت أهذيّ فيك ..
و أنا ماأدري ..
و صرت كلي أبيك ..
و أنا ماأدري ..
هالكون الوسيع ضاق فينيّ ..
و هالناس اللي من حوليّ ..
بدأو يحسون بدواخليّ ..
يالمسَافر..
ماعاد أقوى هالغياب ..
يالمسَافر و رحلة هالعذاب ..
تألمت ../و أرد أكررها .. تألمت ..تألمت ..
كل شيء كان له طعم بوجودك ..
ماعاد له وجود ..
و كل شيء كن يعطر وجودك ..
غطاهـ التراب ..
أمانتك ماوحشتك ..! ..
وماوحشك الوطن ..! ..
رد يالمسَافر عليها ..
ولو بِـ كلمة أيه ..

.

الطُهر · #58 (**permalink**) 30-06-2009, 13:39

كلامِك .. استحَالَة .. ما يأثّر في الـ (

) !
سارة حوالينك ..

الذين يشاهدون محتوى الموضوع الآن : 1 ( الأعضاء 0 والزوار 1)