كم قرَيت أبيات تحكي عن غيابات وْ مدينه
............ عن أماكن تِنْتِظِر في شوقها رَجْعَة حبيب

كِنْت أضْحَك لا سمَعْت انسان فاقد له سنينه
.............. و اتساءل بس ما القى من بإقناعٍ يجيب

لين ما جاني زمانٍ غَيّب الإيد الأمينه
......... عن حياتي وْ صِرْت أسْأل : من يعَلِّمْه المغيب ؟

ليه سَوَّد لي زماني ؟ ليه رَجّعْني حزينه ؟
......... ليه ضيّـق بي غـيابه فِسْحَة الكـون الرحيب ؟

كيف يَجْرَحْني ؟ أساساً كيف تسمَحْ له يمينه ؟
...... كيف خَلّى القـَلْب يصبح في وسِطْ بيته غريب ؟

كيف والاّ ليه ؟ ما ادري .. المهم الحين وينه ؟
........... ويـنه اللى من حـنانه يستمِدّ الـ طيب طيب ؟

وينه اللى ما لقى غيري يسَكِّتْ له أنينه ؟
..... وينه اللى قال عَنّي : ( هذي هي أحلى نصيب ) ؟

وينه اللى ما عَرَف - إلاّ معي - لَذّة حنينه ؟
........... وينه اللي ما يْتِجَرّا حظّي فْـ قِرْبه يخيب ؟

ما هقيت ان السعاده هـ الكِثِر فَعْلاً ثمينه
............. لين ما ذِقْت فْـ بعاده كل أنواع النحيب

وَ ما هقيت انّي أحِسّ بْـ يوم باحساس المدينه
........... اللى ياما ضَحّكَتْني لا بِكَتْ غَيْبَة حبيب