.
اللي أخرنيّ أنو ما أبدأ السرد النوم و النوم العميق ماما يوم نزلت لها قبل شوي تقول "ليه ماتردين على جوالك و التلفون" قلت لها "ليه انتِ متصله " .. مو معقوله نوميّ خفيف مستحيل أنو أنوم لِـ درجة الـ لآسمع : ) .. كل الليل أمس سهرانه من الخوف والقلق و الحالة المرعبة اللي بنعيشها و التقييم و أسلوب التقييم و الوقفه و الجلسه ..الهدوء و الهذرة .. أشياء بتطلع و أشياء بتدخل.. كلام نتذكرهـ و جمل ننساها .. بالمعنى "حوسه بالتفكير " ..
ماأدري أبدأ من التجهيزات و لا أدش باليوم على طول .. عموما بِـ اختصار .. أي شيء يكون بيد نساء يزيد عددهم عن الـ 10 تبدأ الحركات اللي مالها سنع و الأفكار و التشتت فما بالكم إذا كان العدد 40 طالبة .. بِـ بداية الموضوع نوعاً ما حدث لَبس عدم فهم الكلام بدون استماع يعني بنات عادي لو ماسووا هيك مايكونون بنات
..
أمس بالجامعة على آخر الدوام هنوفه بدت تكتب أشياء و أفكار طرت ببالها عشان البرزنتيشن قعدوا يفكرون بالأشياء الناقصه و كيف يجمعونها .. الكل راح البيت و ماتقابلنا إلاّ المغرب على الماسن "كيفك هنوفه ..شنو صاير معاك " .. " والله أبد هذاني قاعدة أشتغل باللي كتبته وعساهـ يزين بس " .. هنوفة كل أمس و أهي قاعدة عليه .. ويوم خلصت راحت يمكن نامت ساعتين و قامت تسوي المقبلات عشان البرزنتيشن .. بما أنيّ قايمة طول الليل عارفه منو اللي نام ومنو لا .. من شان هيك أغلب البنات مانامو ..
على الساعة سته ونص لِـ أول مرة أتصل أقوم أخوي الكبير يوديني .. مشينا أنا وياها و عزمته على كوب قهوة صباحي .. مرينّا د . كيف << لأنيّ قاطعت ستار بكس ألين مايعرفون ربهم زين
.. عاد خسروا "زبونه" بكيفهم : ) ..
وصلت الجامعة و أنا راسي مصدع مانمت و لا ميك أب و لا شيء .. على قولة البنات بسؤالهم "شنو فيك اليوم صفراء " .. تقبلت الأمر بروح رياضيه وبدينا نشوف النواقص وهيك .. عشان خلاص نستعد للبرزنتيشن .. عاد طلعت الشغلات و المكياجات واللبس أشياء حلوة بجد : ) ..
ندش الحين نعرف شنو البرزنتيشن وشنو سالفة تحديدا و المغزى من السالفة الي هدت حيل كل أبونا ..!
البرزنتيشن هو تقديم عرض مُبسط بالطريقة المسرحية أو التعليميه كالشرح أو التجارب لِـ توصيل فكرة معينه أو هدف سامي : ) ..
<< تكت الشيخه ..
"برزنتيشنّا << بتشديد النون " كان يتكلم عن famous characters " شخصيات مشهورة " عبارة عن شخصيات من عدة قرون اجتمعت في حفلة .. كل شخصية تمثل دورها اللبس و طريقة الكلام .. أممم يعني تخيلوا من الشخصيات الموجوده بالحفله واللي أتذكرها لأنها تقريباً أربعين شخصيه بعدد البنات " روميو وجولييت .. أنتونيو وكيلوبترا .. نيوتن ..الليدي ..وليم شكسبير .. روبن هود .. جيفارا .. أجاثا كريستي .. الطقاقة موضي .. هنري الثامن وزوجاتة السته .. المحقق ميغاتوري ..سنووايت وسندريلا
<< قام بدورها طفلتين .. ووو أسماء كثيرة بس هاللي ذكرته "
على هالعمل الجماعي عشر درجات لكل طالبة .. يعني لازم الشغل مضبوط ومافيه وحده بتخرب على الثانيه لأن محسوب كل شيء .. أزين شيء بهالعمل أنو تعرفنا على بنات من نفس قسمنا وهم جمعنا بالإجبار و أحس بمثل هالتجمعات و خصوصاً أنو كلنَّا بشدة ترقق القلوب على بعضها ..
كيف قُدم العرض ..!
من الساعة سبع الصباح و البنات بالجامعة يجهزون الكورنر اللي راح تُقام فيه الحفله .. ستائر حمراء.. طاولات حمراء.. شمعدان .. ستارز يقصصونها و يلصقونها بالأرض .. الكورنر أصبح قاعة احتفالات بالفعل ..
الساعة عشر ونص بدأ العرض .. الكل بدأ يلبس الأقنعة .. و بترجم اللي إنقال بالعربي يعني لاتتوقعون أن فيه كلمه عربيه أُوردت في هذاك الموقف : ) ..
تُنادي أحداهن بدخول الملك هنري الثامن وزوجاته الستة لِـ يُفسح المجال و يُصفق المتواجدين .. يُنادى بعد ذلك الليدي و زورو .. الجميع في الكورنر ..
تدخلن الدكتورات + رئيسة القسم << صاحبة الرأي الأول و الأخير باللي نسويه
..
طبعاً يدورون بينَّا و نتكلم مع بعض و نعرف عن شخصياتنا بزيادة معلومات ..ممكن يجي سؤال هيك داخل بالعرض عن شخصيه يعني لازم نكون حافظين كل شيء عن الشخصيه ..
بالنسبة لِـ شلتي كنَّا هنري الثامن وزوجاته السته .. أنا الزوجة الرابعة : )
بالسهل الممتع ..
أسمها آن كليفز .. ألمانيه و ساكنه مع أخوها الدوك في أسبانيا .. قبل مايتزوجها هنري أرسل لها رسام يرسم صورتها .. بعد كذا جاء و تزوجها .. ماطولت وياهـ قعدت خمس شهور وطلقها بدون أي سبب : ( .. <<< يازين الترجمة بس عسى ماتشوفيني أستاذة العنود ..
الدكتورات مشوا على كل القروبات والشخصيات.. جاء دور شكسبير يلقي قصيدة .. الكل منتبهة له .. كنق هنري طاح .. الكل ألتفت له .. و بدأ المحقيقين يحققون بالجريمة .. نادوا الدكتور كمان شخصيه مشهورة بس نسيت منو .. طلع كنق هنري ميت بالسم و بدأو يتهمون الزوجات و شغاليّن بهالسالفة .. إلاّ فجأة صوت الطِيرَان من الجهه الخلفيّة .. الكل يلتفت يمهم .. الطقاقة موضي وشلتها .. صاحبة الحفلة تسألهم "شنو تبون في ذا " .. قالوا حنا جايين الزواج اللي أقمتوهـ هنا .. الكل مصدوم ويطالع .. أي زواج موب هنا في القاعة اللي بجنبنا .. يلتفتون الطقاقات على بعضهم و يتهاوشون .. و تجرهم صاحبة الحفلة لِـ برا .. و أهم يطقون "لا إله إلاّ الله و لا إله إلا الله " .. عاد أبيكم تتخيلون الطقاقه موضي و أهي تتكلم أنجليزي .. شيء يموت ضحك .. صاحباتي لولي و نوني و شوشو .. أتقنوا هالدور بجدّ .. الكل مات ضحك ..
بعد هالشيء قدمناهم على البُوفية و تكلمنا معاهم عن أرائهم وتوقعاتهم .. الحمدلله كانت مرضية كثير .. التعب والهم والقلق ماراح على الفاضي ..
الله يعطي العافيه لبنتين أهم صاحبات الفكرة عذاري و سارة .. بجد الشُكر قليل بحقكم .. والله قليل .. يكفي تعبكم .. يكفي روحتكم وجيتكم .. يكفي الهم اللي قعدتوا تشيلونه عشان يطلع بهالصورة .. يكفي أنو تكلفتوا بطرح الأفكار وتقبل الأفكار بصدر رحب .. يكفي الأبتسامه اللي أشوفها على كل وحده منكم إذا ناديتها وقالت لبيّه ..
ريمو كمان انتِ ماقصرتي صوتك انبح و انتِ تنادين وتصارخين .. لك منيّ يومين أجازة : ) .. يكفي دعواتك بصلاة الفجر بالتساهيل على القروبات .. يكفي حرصك على الهدوء بعد تمرير الدكتورات ..
صديقاتي قروب هنري و زوجاته .. أسوم د ...أسوم ق .. دنو .. هنوفه.. حنون .. فوفو .. يعني شقول وشخليّ ..أشكالكم .. إلقائكم .. دجتكم .. ترقيعكم .. وهـ فديتكم .. الله لا يحرمني منكم
منّو "طالبة الجغرافيا" هالأنسانة صديقة الروح تبنيناها خلاص بقسمنا خلاص خلاص كلام جديّ ومافيه أيّ تراجع .. أحس برزنتيشنا اليوم كان قايم عليها و كان شغلها الشاغل كان همّها أكثر منَّا .. كانت تروح وتطلع من القسم و متوقعين أنها بالقسم ويسألونها أنتِ أي شخصيّة راح تقدمينها .. و الله أهي تستاهل درجات بعد
..
شُكراً على الميك أب الأوربي : ) .. و الشنيون مايزين وياي تعرفين شعري مره يسحب من طوله لووول ...
شلت الطقاقات الأبداعيات صديقات قلبي .. بجد ماقصرتوا بجد تكفي و جود الأبتسامة على الجميع .. بجد الكل يسأل منهم اللي ورا البراقع .. الأسلوب توحفة .. المشية روعة .. طريقة مسكة اللبس خيال .. الطِيران لا تعليق .. فديتكم وربيّ
الحمد لله كل هذا بفضل الله .. الحمد لله ..
الأثنين 12-01-2009 م
.