.






صباح الهذرة .. مادري فجأه فتحت الصفحه و أبي أقرقر شوي فيها .. أشياء كثير صايرة لي هالأسبوع ..
طبعاً خلاص أختباراتي بتبدأ و بدأت سالفة المذاكرة عشان ليلة الاختبار تصير مراجعة بس "حركات الدوافير " .. اليوم السبت راح يكون عندي إختبار أورال فونتكس عليه 30 درجة .. طبعاً تقسيمها أنو 15 درجة على الكونفرزيشن و 10 على الليسينق و 5 على الترانزكريبشن .. من الحين أنا عارفهـ أنو راح أخذ مابين الـ 18 و الـ 20 .. و السبب يعود لِـ أن الترانزكريبشن ماراح أحله لأنه مثل التجويد و هذي خمس درجات راحت و هاه خمس درجات من الـ 25 على الاخطأ اللفظية أو السمعيه يعني الصافي 20 درجة : ) ..



المهم مابي أفكر بالاختبار .. فيه سالفة صايرهـ يوم الثلاثاء بالجامعة .. لأول مرهـ أجيب معايّ ترمس ماي حار وسكر و ليبتون .. و ماجبت أكواب .. مادري شنو أحس به .. يعني بالله كيف بنشرب .. المهم الله سهلها و لقينا بقايا فنجاين ورقيه مالت قهوة يوم السبت اللي فيها أول مرهـ أتعرف على القشد القصيمي من أيادي قصيميه شيء خوقآآقي بجد .. منَّو قايمة الصبح فديتها عشان تزينه لي تعرف أن ماعندي سالفة .. و أكلت والله بقلب منه كذا شيء حلو مع التمر و القهوة .. و تأكيد أنيّ مرهـ سنعة مدحوني على القهوهـ مادروا أن الوالدهـ الله يطولي عمرها أهي اللي سوتها لي ..
نعود للثلاثاء وترمس الشاي : ) .. دخلنا محاضرة السكيلز و ياثقل دمها هالمحاضرة .. أقسم بالله أنو عشانها أنوم الساعة تسع الليل و أقوم أشرب لي 3 أكواب قهوة تركية و بالسيارة أكل شوكولا عشان بعد شوي من التوتر و الإكتئاب اللي راح أختنق فيه بالمحاضرة .. هي المادة حلوهـ بس والله دكتورتها تنوم تنوم بجد .. تصلح منوم مغناطيسي ولا للي يعانون الأرق يستأجرونها P: .. وتتحول دائماً هالمحاضرة من ثينكينق سكيلز إلى سليبنق سكيلز ..

طلعنا على الـ11 ص و خذينا هالترمس وقعدنا نشرب فجأة صارت هوشه بقربنا وحدهـ بويّة تهاوش وحده و شد شعور وشيء مضبوط .. حسيت أنو سينما و حنا نطالع سعوديات قاعدين يشربون شاي ويطالعون فلم آكشن و يتجمعون البنات و يخربون جونّا ويجون الأشراف و يصير حوسة حوسة موب طبيعية .. و حنا موب بالمود أبد والله البلاء من هالترمس مو يابنات .. !

جاء يوم الأربعاء ويسألونيّ البنات شنو صار تونا نصحصح للمشكلة .. إلاّ بجد ليه الهواشه على أنها بدت بقربنا لكن مادري شنو السبب و ماحد تكلم عنها .. يقهر الشيء أنو تطالعونه وماتدرون ليه .. الفضول يذبح لكن مصيري أعرف و أقولكم ليه : ) ..

كمان بيوم الأربعاء المحاضرة الأولى كانت فونتكس الأهم أنو الدكتورة كثير مدحت البرزنتيشن و ختمتها شكلكم ماتبون درجات .. من الذكاء ماعطيناها أسمائنا.. عاد أهو البرزنتيشن الصاحي ياذكائنا بس : ) ..


طبعاً لي كم يوم قاعدهـ أفكر أعتزل الكتابة يمكن على طول أو يمكن لمدة قليلة مادري .. لكن بجد بديت أفكر بهالشيء بجديّة .. يعني لو فجأة مالقيتوني لاتقولون ماتت أو صار لها شيء تأكدوا أنو خلاص سويت هالشيء وتركت .. ولو لقيتوني لا تقولون لا حول ذي موب قالت بترك بكيفي يمكن مابي :d




السبت 24 - 01 -2009 م



.

{ربيّ لا تذرنيّ فردا}*

tahanisultan@