.










خمس أسابيع .. تصدق أنها خمس أسابيع مرت على وجودك بينا .. و تصدق أن هذي الخمس أسابيع أسرع فترة من السنه مشت عليّ .. خمس أسابيع أيام و أيام .. خمس أسابيع 37 يوم .. خمس أسابيع تصدق توقعتها بس يومين ..
قبل خمس أسابيع وقبل ما ألتقيك .. كنت أحب أجيب طاريك .. بأي مكان .. أبي تكون عايش فيني .. أبيك تكون قدام عيني .. كنت لمن أجيب طاريك و تقرب السالفه على النهاية .. تملا عيوني الدموع ..و أحس ضيقة بالصدر .. قررت أتجنبك .. بس ماأقدر .. تعرف الوالدهـ تتلهف لك دايم و تسأل عنك دايم .. قابلتي أخوك بالماسن .. أرسلك أخوك الإيميل .. رسلي لأخوك هالشيء .. صوريّ لأخوك هالشيء .. إلى درجة ياخوي صرت أكتب أهم أيامي لك عشان تقراهـ .. وياليتك ماتقرأ هذي .. ليتك تتجنبها .. أو تتخيل أنها ماأنكتبت من الأصل ..



تعرف أنت أنك أكثر واحد من خواني وخواتي عشت معه .. و ربيّت وياهـ .. بيوم اتصلت عليّ ومارديت .. صدقني مو عشان شيء .. بس والله ما أقدر .. قلبي مايطاوعنيّ أسمع صوتك و أنت بعيد عنيّ .. كنت أتجاهل اتصالاتك .. وكنت تتصل على الوالدهـ تطلبني .. تجي هي يميّ وتقولي ورا ماأرد عليك .. أقولها إن شاء الله أول ما أفضى أكلمه .. تروح زعلانه عليّ أدري فيها .. يمكن أنا من النوع اللي إذا أشتاق لأحد ومن كثر الشوق ما أبي يحس بألميّ بفقدهـ .. عشان كذا أفضل البُعد .. و أقول يمكن أنيّ هيك : ) ..
عاد بيوم بعدها رديت على تليفون البيت و أنا مستعجلة .. وقلتلي وينك ماعاد لك صوت .. سولفت معاك ببرود و أن الوضع وياي عادي .. استغربت أنك بوقتها و قلتلي أنو أطمنك علّ من فترة لفترة .. قفلت منك ..بكيت .. انقهرت ليه أرد عليك .. و أنا ما أبي : ) ..



وصلت من السَفر ..كان الوقت المغرب .. وكنت بجي أنزل أسلم عليك بس ماأدري شلون ولا أدري بأي طريقة .. مريت على أختي الكبيرهـ .. زين كانت عندنا بذاك اليوم .. قلتلها أنك جيت ومتشققه أنا من الابتسامة ..قالت خليّه شوي .. خلي الوالدهـ تشبع منه .. أنا فوق أسمعك تسولف معاها وتضحك و تمنيت أنيّ مامريت على أختي وقالت لي هالكلام .. يالله تعرف شعور اللي من زمان عنه وودك تخمه تبتسم له ..تضحك معاه.. تقله كل اللي بخاطرك تخليه يحس باللي ورا الخاطر .. كنت بوقتها مشاعر ومشاعر بس ..
جيت نازلة لك و أنت طالع ألتقينا ببوسط الدرج .. صح بكيت بوقتها و أول مره تشوف دموعي و أنت اللي تعرف دموعي ما أحب أستخدمها وسيلة تعبير بس يالله حظك شفتها : ) .. أمانه حلوهـ أو لا p : ...!



خمس أسابيع .. طلعاتنا روحاتنا جياتنا .. ضحك و استهبال .. صراحة ماتطلع إلا بقعدات مقاهي الرياض .. هذرة طفش وملل .. الأجمل أنك عرفت أن أختك الصغيرة كبرت .. و صارت توازيك بكل شيء .. تدري أستانست لمن تقول والله و كبرتيّ .. أحب أشوف نظرتك و ابتسامتك لمن أحس فيها كلمه والله صرنا نعرف الأشياءات : ) ...
أحب لمن أمر على الأماكن اللي هنا و الكل كان يسأل عنك .. و أقولهم جاي أهو من السفر يمكن على عيد الحج أو بعدهـ .. كانوا دايماً يبلغونك سلامهم .. وكانوا دايماً يدعون أن الله يردك سالم .. و حبيت فرحتهم بشوفتك ..



خمس أسابيع .. و حركات المشي بشارع التحليّة آخر الليل .. و الشباب اللي يطالعون شنو هاللي بايعينها وجايين هنا قلة الأماكن ..
خمس أسابيع .. و اللي أنت ماشبعت من بر الرياض .. حتى أنك خذيت حفنة رمل تبي تتذكرهـ .. تبي تشمه فيه ..
خمس أسابيع و أنا أحاول أقنعك إذا خلصت دراستك أبقى هناك لا تجي يم السعودية .. و أنت تحاول تقنعني أنيّ ألين ماأجي يمك و أكمل الماستر نرد سوآ .. لأن حضن الوطن أجمل بكثير .. و لأن حياة الوطن أشرف بكثير .. و أقنعتني ..



خمس أسابيع انتهت أمس و أنت تجهز شنطتك .. تودع بقايا ساعات تتنفسك .. تطلب الوالدهـ أساعدك و أنا أرد أطلبها تعفيني لأن ماأتحمل .. قبل لا تسافر رحت لغرفتي .. قفلت بابها .. وحاولت أغطي التفكير بمذاكرتي .. تتصل علي تطلبني أوادعك .. تبي تخمني و أنا أقولك ماله داعي هالموادع و أنا راح أشوفك السنه الجاية يمكن راح تتأخر بعدها شهرين أو ثلاثة بس أكيد بشوفك .. ما أبي تكون بينا لحظة وداع .. ما أبي أودع شنطتك و أنت تسحبها على الأرض .. أجبرتني و جيتك بعيد عن أرادتي .. أشوف الدمع بعيون أميّ وصمتها .. و أنا أحاول أكتم العبرة و أدعي لك .. الله يحفظك و انتبه لنفسك و أي شيء تبيه اتصل علي .. ترد عليّ طيب رديّ علي أليّا اتصلتلك ..

المهم ما أوصيك أليّا وصلت طمنيّ عليك ..!
أختك الصغنونة على قولتك : ) ..






صباح كئيب بدونك
الأحد 01-02-2009 م




.

{ربيّ لا تذرنيّ فردا}*

tahanisultan@