.
الساعة 9:20م
لا لا الساعة 9:27م ..بعد القرقرة مع دنو و توقعاتها لأختبار بكرهـ بمنهج تاريخ الأدب ..
الليله هذي أسمها ليلة الأختبار .. وبالليلة هذي كل الطلاب و الطالبات يعرفون شيء أسمه بوكليت و كتاب و قلم .. وهات يادفش بالكلمات والأسئلة و الأوراق الخارجية بهالرأس الصغيرون .. إلى درجة أن الشخص فيهم يقعد يحفظ ولا يدري شنو أساسه أو شنو آخر .. المهم يحفظ .. و يقرب وقت الأختبار و أهو مازال يذاكر .. وسبحان الله على كثر مايذاكر .. تطلع له أسئلة وشغلات قبل مايدش قاعة الأختبار عمرها مامرت عليه و أهي اللي تجيه بالأختبار .. وكل قعدته هالمسكين لمدة 12 ساعة مافادته إلا إذا بصح وخطأ أو أختياري إذا باقي يذكرهم ..
أنا لي بهالمادة أربع أيام تقريباً و أنا أذاكرها .. وأقوم أقعد مع أهلي .. وقهوهـ و شاي و قت الحلى وعشاء و غداء بحديقة البيت و الجو يزين و الأهل تتغير نفسياتهم يصيرون يحبونن أكثر و يلبون طلباتنا أسرع : ) .. المهم هالمادة موب راضية تخلص مادري السبب تهرب مني مادري لأن العرق الخليجي مأثر فيني ولازم أختم المادة بسؤالين اللي قبل القاعة و أدخل مبعثره باللي قريته و اللي ماقريته ..
اليوم من الظهر ضيعت قلمي الأحمر لأن مذاكرتي و حفظي يعتمدون عليهِ ..و عاد ضاع يعني مافيه مذاكرة أو تثبيت معلومات قلت يالله عاد هذا حظي و خذيت قلم أخضر وجلست أذاكر .. بس والله مافيه فايدهـ قعدت ساعتين على هالحال وأنا أكتب و أقعد أقرأ اللي أكتبه حتى أن جيرانا متصلين على أهلي يقولون حفظنا من بنتكم دروسها أهي باقي ماحفظت << ماتجوز الطنازهـ
..
الساعة 3 العصر والله اللي ماعاد أشوف شيء من التعب قلت بريّح لي شوي و أروح أدور لي على بقايا أكل ..
بعيد عن سالفة المذاكرة .. شفتوا جو اليوم كيف أهو ممطر ورايق بالحيل .. أنا ماكنت أدري كنت محبوسة بغرفتي ماعرفت إلا من اتصال انقال لي أن في أشياءات ومطرات برا ..على المغرب خذيت جاكيت ضد الماي و كتابي وكوب القهوهـ ورحت يم حديقة البيت وذاكرت بس شيء بجد رهيب.... نرجع لسافة الغداء لأن باقي مقهورة من هالسالفة : ) شوفوا يوم نزلت تحت أدور أهلي وين ماما و ين بابا مافيش حد .. أتصلت على ماما أقولها وينك قالت والله بابتك شاف الجو حلو أتصل على أخوك و عزمه ورحنا بقرب الجنادرية يقولون البر هنا حلو .. والله ماتصدقون أش كثر أترجاهم أبي أطلع يم البر ولا حياة لمن تنادي ..يوم علي أختبار زانت لهم سالفة البر وراحو : ( .. يعني ليه هالحركة مادري .. أقول لماما طيب أنا كم مره قلت لكم نطلع يمه وماترضون قالت شنو يخصني قولي لبابتك ليه ..أهي تعرف أنيّ ماأقدر أناقشه بأي شيء سو قلت لها الله يحفظكم وتهنوا هاه تهنوا : ) ...
قعدت راجعت المادة ودوبني خلصت منها .. بس باقي مراجعة التثبيت اللي هي تكون الأخيرة و الأساسية بالموضوع بس راح تكون على ثلاث الصًبح ماأبي أستعجل فيها ..
هالأسبوع راح يكون حافل بالخوف و الرهبة و المذاكرة و الإجتهاد .. ربما يكون حافل من قبل المُصحيين بالعدل أو الظُلم .. ربما يكون حافل بالتعب النفسي و الدموع ... وربما يكون حافل بالفرح و الأرتياح والصدمة بالنتيجه : ) .. يعني الله كريم ..
أي على الطاري بيشو جربت سالفة الشايّ و تاريخ الأدب بجد شيء أبداعي : ) .. شكراً على النصيحه ..
هنوف أنتظرك على سالفة مراجعة تاريخ الأدب إذا مطولهـ رسلي مسج على موبايلي ..
و الباقين دعواتكم ليّ ولِـ بنات قسمي الأنجليزي و باقي الأقسام بالآداب عشان مايزعلون و اللي بالجامعة و دقيّ يامزيكا
برب أردد ياليل مطولك ...
الجمعة 06-02-2009 م ..
.