.





و لأنيّ أحُب صباحات معرض الكتاب .. و أحُب أنيّ أكون من ضَمن من ذهبوا إليه في أيَامهِ الأولى أخترتُ أن يكون يوم صباح الخميس الماضي .. و لأني تونيّ أروق راح أتكلم عنه وفيه ..


معرض الكتاب من أحد أروع أسابيع السنة في الريَاض .. طبعاً مادري من الفرحة أني بروح يمّه و لا أهو لأني بقابل كُتب وكتاب ومثقفين خلانيّ هالشيء ماأنوم أبد إلاّ على الساعة ثنتين بالليل و قمت الصُبح الساعة ست وهم رديت أكمل نومتيّ ألين ماجاني اتصال من أخوي الكبير يسأل إذا باقي بروح أو لا .. طبعاً شلون ماأروح قلت له خلاص أوكي قمت .. قفلت منه و أطالع الجوال باقي الساعه تسع وعشرين دقيقة .. قمت أتصلت على "شموخ أنسانه " اللي هون معانا :d .. وقلت لها يالله صحصحي عشان نروح .. هم أتصلت على بنات أختي وقلت لهم على العشر وربع راح أمر عليكم .. و بدأ مشوار التجهيزات النفسية ..


تحركنا من البيت الساعة عشر وعشر الصبح و مريت على كل البنوك اللي بالسعودية .. و ياأنها عطلانه أو أنها مخلصه فلوسها .. دايم هذي حركتها فيني كل صباح .. بالأخير لقيت بنك وسحبت منه لأني توقعت أن بالمعرض مافيه بنك و هذي من أحدى سيئاته ..


وصلنا و زحمة العالم عند الباب موب طبيعية .. بجد ماشاء الله كان الأقبال كبير له هالسنة عكس روحتي العام أحسهم كانوا أقل و صباح يعني غريب مرهـ .. المهم دشينا ومسكنا الطريق الطويل مشي : ) و ياهي انفتحت نفسيتي بجد أطالع الناس و الموجودين و أنا أمشي و أقول يالله كلهم مجتمعين عشان شيء واحد "القراءة " ...


دخلت و بديت من يمين المعرض لأني قاعدهـ أدور على "شموخ" و ببدأ رحلتي معاها فأضطريت أنو أمر تقريباً على جميع المعرض و أخذ فكرة سريعة .. تقابلت أنا وياها و لأول مره و بدينا نتمشى بين دور النشر نقرأ و نأخذ الأستايل المُحبب لِـ أنفسنا ...


كان زحمة الرجال و قليل النساء .. و المشكلة الثانية اللي واجهتني أنو أبي أوصل للكتاب لكن لازم أنتظر زحمة الرجال تخف أو أن اللي واقف عند هالجزء يبعد شوي عشان أقدر آخذ اللي أبيّ .. و لمن أطلب اللي بالمكان يجيب لي الكتاب اللي ماأقدر أوصله من الزحمة الكل يلتفت علي وعلى الكتاب اللي أطلبه .. حسيت كأنهم يبون يسابقونيّ عليه .. أو يطلعون على محتواهـ إن كان يستحق أو لا ..


من أكثر الكُتب أهمية و اللي حرصت على أنيّ أقتنيها الكتب النَقديّة و الفروقات الأدبية بين العُصور .. ربما لِـ اتصالها بدراستي أو ربما بسبب تأثير الدراسة على عقليتي ففضلت أن تكون كتبيّ من هذا النوع ..
لم يخذلني جمعها .. فَـ أنا قبل أن أقتني الكتاب أبحث عنهُ جيّداً .. وبعض سرعة المرور على المحتوى و الفهرس يعطي إدراك أوسع ..





تلك هي الكُتب التي سَـ أبدأ رحلتي معها حتى أُنهيهَا ..



1- أقنعة الخوف - عيد الناصر - دار الفراديس لِـ النشر
2- أبو شلاخ البرمائي - غازي القصيبي - مكتبة تُهامة
3- راسبوتين - عصام عبدالفتاح - مكتبة تُهامة
4- كشكول طالب ثانوي - محمد الهويمل - دار الكفاح لِـ النشر
5- القراءة و توليد الدلالة "تغيير عاداتنا في قراءة النص الأدبيّ" -د.حميد لحمداني-المركز الثقافي العربي
6- السجينة - ترجمة غادة الحسيني-دار الجديد
7- الأشج- غازي القصيبي - مكتبة تُهامة
8-الأعمال الكاملة لِـ جبران خليل جبران - دار رسلان
9-في أعماق الروح"الحلم في القصة القصيرة السعودية "-تهاني المبرك-دار المفردات
10-أنسنة الحرف -إبراهيم الجريفاني-دار بيسان





وبس ...







الثلاثاء 10-3-2009م







.