يارب يكون الأسبوع الماضي رائع .. و في الأسبوع القادم التشويق و المزيد من الكرف و انتظار الأمل.. و ياعسى إن شاء الله بين الذكريات و بين حلم المستقبل أمل يرضي اللي بذواتنا و يحسسنا إنا نقدم أشياء تخدم الآخرين لا تكون عائق لهم ..
قمت هالمساء و أنا رايقة جداً جداً جداً .. و حاولت قد ما أقدر أبتعد عن الضغوطات من كل الجوانب حتى أعيش ساعات هاليوم برضا على ذاتي و برضى على اللي حوليّ .. لكن "يافرحة ماتمت " إلاّ شيء يصير يعكر المزاج .. إلاّ شيء ينكد عليك يومك ..
فتحت الـ "لاب توب" و بديت أتصفح مواقعي المعتادة .. بعد ماخلصت قلت بدش شوي على الإيميل و هنا كانت الفاجعة .. أدخل الرقم أول مره "خطأ" مره ثانيه"خطأ" مرهـ ثالثة "خطأ" .. ياربي شنو السالفة ..هالإيميل كمل معاي السنتين و تزيد .. يعني مستحيل أكون غلطانة بالرقم .. تعوذت من الشيطان و قريت عليه قلت يمكن صايبة شيء .. مع ذلك مارضى يفتح .. و السواة ..!
دخلت على إيميل ثاني و أضفت إيميلي و كمان هنا كانت الفاجعة الثانية .. تمت إضافتي على الماسن .. من الصدمة بديت أسولف قلت السلام عليكم .. قال وعليكم السلام .. قلت كيفكِ مالك شوفة اليوم .. قال لي معليش حياتي أنا اليوم مشغولة .. أشوفك بكرة بالجامعة .. برب ..
ياقوة وجهه سارق ايميلي و معليش يتكلم بِـ لسانيّ خير :| .. قلت تعالي تعالي .. أسلوبك متغير ليه .. قال لي معليش والله نفسيتي تعبانه بكرة اقولك على الموضوع بالكامل ..
يالله .. قد ايش فيه ناس بجحين مثل هالإنسان ماشفت .. طلعنيّ من طوريّ قلت له ..الله لا يسامحك سارق ايميلي وبيوم جمعة .. والله ادعي عليك ربي مايوفقك << عاد أسلوب البنات إليَّا مره قعدت تنافخ من ورا الشاشة وتدعيّ
ولا حياة لمن تنادي ولا كأن وحده قاعدة تدعي عليه قبل شوي .. شوي قالي خلي صاحبة الإيميل تكلمني و يدز لي الرقم ..يعني بفهم سارق ايميلي تبي أكلمك ليه .. من أنت عشان أكلمك ..!
هنا أنا عاد خلاص قلت السالفة مافيها ياحياة أو موت ...قلت شوف ياأنك ترجع إيميلي يا أنك بتشوف شيء ماشفته من قبل .. و بالأخير أنا اللي ماعاد شفت إيميلي ..
و أنا قاعدة أزين لي إيميل جديد أسأل نفسي لهالدرجة ماعاد فيه خصوصيّة .. لهالدرجة الناس تنتهك البعض ولا أحد يحس برقابة ذاتية .. أو رقابة من الله سبحانه وتعالى .. الأشخاص اللي زي كذا .. أشخاص بعقل .. أشخاص مبدعين ..لكن للأسف كل هالأبداع وظفوهـ لِـ التلاعب بِـ أشياء الآخرين الخاصة .. أحدى المنتديات العزيزة على قلبي بعد كل يومين يتقفل من قبل الهكر .. المقصد و لاشيء ..مجرد فضاوة .. و شباب عاطل عن التفكير لأي شيء يخدم صالحة .. من غير العبط اللي معيشين أرواحهم فيه .. زي هالأشخاص ليه مايُستفاد منهم بأمور أخرى تخدم أشياء كثيرة و تخدمنا .. ليه الأنظار مو عليهم .. لمن أفكر كم قعدوا وسهروا عشان يتعلمون اختراق أو تهكير مكان .. ألقاهم بالأسابيع و الشهور .. وأرقام وحسابات ومنافذ وطرق مالها أول من آخر .. والله خسارة هالشباب يعيش على أمور كذا بجد خسارة ..
بعد التفكير .. و التفكير .. فتحت بيت جديد .. نظيف .. مافيه ولا كونكت
.. و بديت أرسل للي بجوالي أن الهكر تراهـ يتميلح ماعليكم إلاّ تحذفونه و الله يتولانا برحمته .. اللي مقهورة عليه أكثر شيء مدونتيّ تابعة لِـ الإيميل نفسه .. راحت مع الإيميل
.. و هالشيء بيخليني أفكر أفتح مدونة خاصة بِـ رابط مُباشر .. لكن مو الحين لأني مشغولة بِـ دراستي كثيراً .. لكن قريب راح تكون بِـ أذن الله ..
لِـ
إيميلي المهكّر http://www.6rbtop.com/library/resour...n/49483_hi.ram