غريبة بعض الأيام تكون حدث لِـ الإنسان مُربك و أحيان تكون جادة إلى درجة التفكير أنا بشنو غلطانه معاها عشان تكون معاي كذا .. لكن الأمس رغم جديته مع الصباح إلاّ أنه تغير كثير مع بدايات المساء .. زعل الأيام ماينوصف ..

أمس كان حدث من نوع آخر .. حدث تتوقع أنه مستحيل أو يمكن ماراح يصير بِـ الوقت الحالي يعني بيصير بس بعد كم سنه .. المهم أن الحدث بدأ من السَاعة أربعة العصر .. مرت على أسوم د و بنروح نمر على فنو عشان بنرجع للجامعة و نروح معاهم مره وحده .. صارت الساعة خمس أتصلت وحده من البنات اللي وصلت قبلنا وقالت تأخرتوا البَاصات راح تتحرك .. عجلّوا شوي .. و صلنا و أهم خلاص يركبون البَاصات .. أعطوني الكاردات مالتنا أنو حنا وياهم و رحنا .. و أنا بِـ البَاص الجامعيّ و لِـ أول مره أركبه .. مجموعة كثير من البنات وسواليف و أقدر أشبك خط مع أي أحد و أسمع سواليفه .. عالم آخر الصراحة .. قعدت بِـ المقعد الثالث من الأخير و جلست جنبي وحده ماعرفها و صديقاتي وراي كل شوي ألتفت لهم و أرد أرجع أجلس عدل .. هو الصراحة شيء حلو بس يوم زاد الوقت عن خمس دقايق أنا بديت أنزعج من الأصوات و بديت أطفش و أحاول أقاوم هالشيء و أقعد أسرق النظرات من الشُباك .. السيارات صغيرة مره و بكل مره يلتف البَاص أحس العالم كله يلتف معي .. حتى لمن يركب مطب يالله شيء يخوف .. كان شيء حلو أنو جربته وكيف تحركاته وكذا .. وصلنا عند الانتركونتننتال .. و عند الباب الخطأ يوقف البَاص وماكان وده يتحركه .. ويحاول يشغله السواق وماهو راضي .. أنا ماخوفي إلا من هاللي تحت جالسين برشاشاتهم .. أشكالهم تخوف بجد .. و قدام وزارة الداخلية و باص ياعيني بجد : ) ... المهم مره مرتين بالثالثة أشتغل .. والله أخذت نفس عميق .. ويتحرك .. ويدش من الجهة الثانية ..

بالمناسبة الحفل كان لِـ صاحب السمو الملكي الأمير نايف بن عبدالعزيز النائب الثاني لرئيس مجلس الوزراء وزير الداخلية .. جامعة الأميرة نورة قامت بِـ عمل هذا الإحتفال لِـ توليهِ المنصب .. طبعاً توقعنا بس راح تكون كليّة الآداب المتواجده .. بس كل الكليات الثانية موجودين وتعرفنا على بناتهم ..عاد كلنا نحمل أسم واحد ولانعرف بعض مشكلة ..وصلنا على الساعة ستة المساء و على بال ماجاء البقيّة وهدأ الوضع و اجتمع الكل جت الساعة تسع .. على الساعة تسع و نص بدأو تحضيرات قدوم سموه .. و بدأ بداخلي هذاك الشعور اللي يحسسك أنك بعد فترة راح تقابل شخصية يمكن راح تقابلها وجه لِـ وجه مره ثانيه بِـ لقائات مثل هالنوع .. خصوصاً أن القاعة كان فيها طالبات ودكاترة و العمادة و التابعين للعمادة .. كل اللي حسيته كان شعور رائع جداً .. دش الأمير و الكل وقف للسلام الملكيّ و بدأ الحفل .. بعد كذا طرحوا بعض المشاكل و القضايا المتعلقة بِـ المرأة و وزارة الداخليّة ووعدنا الأمير إن كل شيء راح يتخذ فيه اجراءات خصوصاً أن المرأة تشكل نص المجتمع و المرأة الآن أثبتت وجودها في عدة مواضع .. كان اللقاء جداً رائع .. وكان الرد على الأسئلة ذا منطقية و موضوعيّة .. خلص الحفل ..

اتصلت فنو على بابتها لأن الوقت صار متأخر .. طلعنا من الحفل قرابة الساعه 11:45م .. وعلى مابال مانوصل على الساعة 12:10م .. و أبد سواق أسوم د رجعني للبيت وراحت أهي لبيتها .. بس كان يوم بالنسبة ليّ .. لا يُكرر أبداً .. و هذا اللقاء جعل بداخلي شيء من النشوة و الوصول إلى فكرة أن المرأة أصبح لها مثل الرجل هُنا في المملكة ..





الأثنين 11-05-2009م