.
.
هدّيت حلمٍ .. في يديني بنيته
____________ مسكين من يبني خياله على اوهام
صحيح لو شفت بعيوني .. قريته
_______________ لا كنّ قلبي ميّتٍ .. صار له عام
بعت الذي ياما بدمعي شريته
______________ " لوحة يتيمة " .. كانت بيدّ رسّام
و ذاك الطريق اللي لدربه مشيته
______________ قامت عليه بيوت و اسوار و اوشام
شقّيت له صدر الجفا و اعتليته
______________ و شدّيت جرح الليل بسراج و حزام
لا لا يجيني .. غاليٍ لو نسيته
_________________ عينٍ له النيّة .. و عينٍ له حرام
شفني أمامك .. ناسيٍ درب بيته
______________ بلساني اللي عن طواريه قد صام
باقي كلام بخاطري .. ما حكيته
_______________ تعال لحظة .. لا تصدّق هالأحلام !
و الله ولا به ليلةٍ .. ما بكيته
____________ دوك الوسايد تنتحب ( صارت .. وسام
للدمع و احساسٍ بنفسي خفيته )
_________________ لو قلت لك ربعه و الله فلا تنام
أهدّ عرشه و الغلا .. ما هقيته
________________ ملعون صير .. معلّقٍ فيني خيام
منصوبة لـ حبّه و الاطناب صيته
_____________ دِقّت بصدري من شهر و اربع أعوام
دوك البقايا .. دوك ليلٍ طويته
________________ تقرا رسومه " كيّه بقلب منضام "!
أجوع له و اشفق لريقٍ ضميته
______________ و احن .. و اكتم ضيقةٍ صارت الهام
غلطان من قال الهوى قد رويته
_______________ سلّم على قلبه .. ترى الوعد قدّام
لا صاح ذيبه .. والزوايا وبيته
_______________ و كل الفضا لا صار في عينه عتام !
وش رايك بقصر ../ بغرامه بنيته
______________ عرفت كيف الحلم يبنى على أوهام .؟!!