اليُوم الخميس .. جيت لحوراء ., علشان نرُوح دورة التصميم الداخلي مع بعض , بس تأخرنا شوي , فقررنا ما نرُوح , وجانا اتصال انّو بكرة في دورة وراح نلتقي بروائيين لبنانيين .. طبعا الأمر كان عادي بالنسبة لحوراء , ومثير للإهتمام بالنسبة لي , يارب يكُون بكرة شي مُميَّز,
واتفقنا نروح دورة الفوتوشوب مع بعض يومياً الصباح .., ويا كثر الاتفاقات هاليُومين ..
كلمت آلاء ., عالمسن .. وآخر مرّة كلمتها فيها كانت يومين لما رحت على زيارة بيتهُم علشانها رجعت من السفر , وأذكر انّ أخوها ذبحنا من اللقافة , المُهم قالت لي انها جاية لزيارة بيتنا خلال هالاسبوع ,
بنت عمّتي الي أكبر منّي بكم شهر بتنخطب , اليُوم اتصلت عمّتي على خط البيت وأني الي ردّيت وحسيت بسعادة كبيرة بصوتها , طلبت أمّي , كلمتها .. فالفضُول خذاني .. ورحت سالت الوالدة , عن عمّتي , وقالت لي ملجة بنتها هالشهر ..
وأحس بنت عمّي غيرانة على الآخر من طريقتها لسرد الموضوع لي , وربّي كل ما اتذكر طريقتها في الكلام أضحك من قلب .. هذا لو درت انّ الملجة هذا الشهر وش راح يصير ..[
] / الله يكتب الي فيه الخير .. / ويوفق الجميع .. بنت عمتي الي بتنخطب قريبة منّي روحياً .. أرتاح لها .. مع أنّي ما أكلمها الا نادراً .., بس طيوبة .. وحبُوبة .. وماشية طريقها صح .. وعارفة ربها وهذا المُهم .. حوراء صديقتي من زمان ما كلمتها , والدُوبة دايم أزورها وهي أبد ما تفكر تزورني لكن خلاص قررت أسوي اضراب تام عن عن بيتهم لين تجيني ..
البارح رسمت لوحة / وحسيت هاللوحة صارت قريبة من قلبي .. حسيتها بنتي [
] والبارح بعد .. كانت ليلة مميّزة , وكل عام وألـ هند إلى ربها أقرب / بخير .. زهراء أختي طفشتني طفش مو طبيعي ما ارتحت منّه الا يوم نامت بالساعة خمس الصباح ..
صار لي مواصلة من أمس مو نايمة , بس كتابة وقراءة وتصفح منتديات أدبية .. ورسم !
الخميس / العصر .. زهراء تضبط شعرها صار لها ساعتين الحين .. مو شعر هذا [
], وحوراء تشوف توبيكات / ياربّي عالفضاوة !! وأني اندمجت في قراءة رواية , وكتبت شيء حلُو جداً .. بس بحتفظ فيه لنفسي .. الليلة رايحين حفلة زواج .. ويا كثر حفلات الزواج بالصيف .. موسِم ’, اشتقت لمحمد أخُوي الي سبقني وراح ياخذ عُمرة .. [] , وكل مرّة يتصل أكُون مو موجودة ..! محمّد عمره عشر سنوات .. بس عنده عزيمة قويّة .. وأشوف فيه أشياء كبيرة جداً .. يشبهني في صفات كثيرة .. بس أشوفه أفضل منّي .. , لما جه يسلم علي قبل لا يسافر .. قلت له محمّد .. انت باصرارك .. تعطيني حافز يخليني أتمسك بكل أحلامي .. انت شي حلو محمد .. خذ بالك من نفسك .. ولا تطَّفّش خالتي بالسفر .. ! والحين أحس اني أفقده .. يارب يكُون بخير , ويرجع لي سالم .. أوووه نسيت أكتب عن سفرة حوراء صاحبتي للمدينة [] , يا قلبي على سفرتها , وربّي من رجَعَت لحد الحين واني كل ما اشوفها أضحك .. من قلب , وفي داخلي [هم] .. ,أوّل ما قالت لي .. حسيت بالكسِيرة بدَاخلِي .. , المُهم اني قلت لها حوراء أمانة شوفي لي الأوضاع بالمدينة شلُونها .. [] .., المُهم أوّل ما رجعت لقيتها بالمسن تقول لي ساااااارة تراني ردّيت من السفر ونمت وصحيت والحين انتظرش بالبيت ..وبما انّ واجب علي أروح أشوفها , كنت تعبانة ومو نايمة بس رحت لها .., أول ما شفتها حسيت بالراحة انها رجعت .. وانها قريبة ... وبدأت تسرد لي كل تفاصيل السفر , والموضوع وما فيه انّ حتى حوراء الهادئة الي مُستحيل تجرح أحد أو تصرخ بوجه حد .. أو تعاند حد .. انقال لها [كافرة ومشركة وملحدة] [] .. قويّة عاد [كافرة ومشركة وملحدة] في الوقت نفسه .. ومن يوم ما جت لحد الحين واني كل ما اشوفها اضحك ..أقول لها أجل على آخر عمرش صرتي كافرة يا الحور .., لا مو بس كافرة .. ومشركة وملحدة بعد .. تقول لي يا سارة .. ما سوِّيت شي , ولا كلمت أحد ولا نقصت من قدر حد في حالي صدقيني .. وتعرفيني مستحيل أسوي شي اصلاً , ما عندي جرأة .. قلت لها اي ادري فيش ..بس يالله انتي في كل الحالات كافرة .. وهُم المُسلمين .. / خليهُم المُسلمين ..! تقول لي بس الحمدلله انّش ما كنتين موجودة .. كل ما أروح عند حرم النبي أقول الحمدلله انّ سارة ما جت معاي ..! مع انّي مو متهورة .. [] بس اذا حوراء قالوا لها كافرة ,!.. مُستحيل حد يقيّدني بتصرفات ويمنعني من شيء .. ويكمّم فاهي .. ويقيّد حرياتي , ويقول لي أي كلمة سُوء ويكفّرنا (فيس تو فيس) .. وأسكت !! / لو كنت مع حوراء وتنقال لها هالكلمة قدامي ... !!!! ربّي ساتر على عباده ..