صباح الخير .. راح أشتكيّ لِـ مُذكراتيّ .. مادري يمكن فلسفتي صح و يمكن أكون غلطانة ..


يبونا نحب .. يبونا إلاّ نعيش الحب بِـ مشاعره الحلوة .. طيب و هالحب ماوراه طلبات .. مافيه حقوق وواجبات على كل الطرفين .. يعني أنت ببيت أهلك و تحس أنك ماتقدر تسويّ شيء يخرج عن العائلة .. و إذا حبيت فوق هالشيء راح يكون الشيء الوحيد ببالك شلون تداري على حبيبك .. وشلون تهتم بِـ مشاعرهـ .. و يكون شغلك الشاغل هالحبيب .. حتى أنك تبدأ تخل بِـ الأشياء اللي مفروض تهتم فيها وتراعيها عشان جانبك الأجتماعيّ .. وتعاملك مع أهلك يشين مره .. و تبدأ تقعد لوحدك .. وتعتزل مع ذاتك .. تفكر فيه .. شنو يسوي .. مع منو .. يحبني .. مايحبني .. إلخ ..


طيب لِـ نفرض أنك حبيت و تدبست بهالحُب .. و عرفت الشخص .. عرفته زين .. عرفت متى يقوم من النوم ومتى ينام .. شنو الأشياء اللي تضايقة ..
وشنو الأشياء اللي يحبها .. متى يحب يتكلم .. متى يحب يسكت .. حتى أحيان توصل إلى أنك تقول نفس جملته بِـ الوقت الي يقولها و أهو و بنفس الوقت .. يعني صرت جزء من روحه اللهم أنها بِـ جسد ثاني .. طيب و بعدين .. ! .. لِـ نفرض بعد هالسنين كلها وبعد ماتعرفت عليك زين .. يجي يفاتحك بِـ موضوع "والله أهلي خطبوا لي وحده " .. طيب! .. أممم و أنا وافقت بس تكفين واللي يرحم والدينك أنا ما أبي غيرك ..دآآ .. أجل ليه وافقت عليها من الأول .. والله يابنت الحلال أهم غصبوني وأنا ماقدرت أقول لا .. أهله غصبوه و أهو وافق .. مو اللي بيتزوج أهله موب أهو .. طيب نمشيها .. يرجع يقولها تكفين لاتتركيني أنا ماحبيت غيرك ولا عمري حبيت أحد غيرك .. أنتِ الأساس بحياتي .. و أنتِ و أنتِ .. و أهي تمشي له من هالحكي .. و تجي الطامة و اللي أنا بسببها أكره طاري الحب و سنينه .. " والله أنا راح أتزوج الليلة و أنتِ معزومة " .. :| .. هنا بجد بجد لاتعليق ..


ليه لمن الواحد مايكون قد الحب .. ليه يحب من الأول .. ولا عشان خلق الله يحبون أنا أحب زيهم .. ألعب على بنات خلق الله .. و أخليهم يكلموني من ورا أهلهم .. و يتخبون بِـ غرفهم .. و أقعد بالساعات معاهم .. و أمها تتوقعها قاعده تدرس ولا تسوي شيء ينفعها .. و أهي قاعده طول الوقت مع الأخ الشاب اللي بيخطب بعد كم يوم بس يمشي هالشهور اللي أمه قاعده تدور له على عروس .. والله شيء يُستفز منه الواحد ..
شيء ثاني .. أهل الغزل .. عمرهم مايتزوجون وحده يعرفونها عن طريق الجوال .. قالوا أيش قالوا اللي تكلمنا تكلم غيرنا .. دايم يحبون الغموض حتى باللي راح يرتبطون معاهم .. يعني أحيان و أنا أفكر فيهم وفي تصرفاتهم .. طيب يمكن هاللي تكلمها أفضل بكثير وماكلمت غيرك .. ويمكن هاللي جايه عن طريق أمك عرفت ألف و ألف واحد و يمكن خربتها وماوقفت السالفة على مكالمات .. بس تظل الراحة النفسيه عندهم أهم .. يعني و أهو مقتنع يقول أتزوج وحده مااعرفها ولا وحده تعرفت عليها بأي وسيلة كانت : ) ..


نرجع للي تزوج .. اللي تزوج هذا ..الله يهدي بعض البنات .. تصدق حكيهم وتظل معاه حتى بعد الزواج .. أنا ماأدري يعني قبل مايتزوج هاه يجوز فيه أمل يخطبها .. بس بعد ماتزوج يعني تتوقع بقرارة ذاتها أنها راح تكون زوجته الثانية .. ! .. ولا راح يطلق الأولى و يتزوجها أهي .. يعني أسم أنو يسكت أهله بزواجه الأول لكن بزواجه الثاني يكون بِـ اختياره .. هذي جهه .. الجهه الثانية بعضاتهم يسحبون على البنات اللي يكلمونهم ثلاث شهور أربعة .. بعدين يرجعون لهم.. و بعضهم أليّا مرته كانت حامل وولدت ومو فاضية له رد على "أكس قيرل فرند " ورد يكلمها .. لأن مرته جتها فترة وماقدرت تأدي وظيفتها الزوجية سو أهو رد و أستخدم الأسبير ...!


وهم يردون ويقولون أنتو ليه ماتحبون .. وليه ماتعيشون هالعمر .. أجمل مافي هالعمر الحُب .. و هات من الأغاني ومن المسلسلات ومن الكتابات اللي أحيان أقراها و أقول هذول يحبون ملائكة مايحبون ناس طبيعية ..

أممم صح الحب شيء كويس وشيء حلو مانيب ضده ..بس مو أحب معناه أفصل العاطفة عن العقل و أوقف جميع الخطوط اللي تشبكهم ببعض .. كمان العقل نعمه ويخلينا نميز اللي نحبهم ويحبونا صح من الناس اللي بس يبون يستمتعون و أليّا جاء وقت الحكيّ الجد ينسحبون و يعطون ألف و ألف عذر .. بس أهم لو يتذكرون أن للناس أرواح و إنسانيّة زي اللي عندهم كانوا حسّوا على دمهم و لا ...!





الجمعة 28-08-2009م




.

{ربيّ لا تذرنيّ فردا}*

tahanisultan@