كانت الصورة جميله .. وكان في الصورة طفل
وخلفنا كانت مره تلبس عباه .. وأطرف الصورة ولد يضحك صباه
وقربنا حطت حمامة ,, قربها حطت حمامه
تذكرين شكثر كانت ابسط الاشياء ,, تثير الانتباه ؟
وفي البعيد احتفظت الصورة ,, بمنظر مهر جامح
وفي البعيد فآخر الصورة ,, شخوص بلا ملامح
تذكرين شكثر كان الوقت شفاف وحنون وطيب ومبهج ودافي .. ومتسامح ؟
وكان في الصوره .. وهذا اجمل اللي كان في الصوره ..
طباعك !
نظرتك والشيطنه في داخل عيونك ,, جنونك ., واندفاعك ,.
بسمتك لما تطوقني ذراعك ,,
اذكر انك قبل ندخل هذي الصوره في لحظه
التفتي لي وقلتي : قول احبك ..
قلت اخاف اليا تكلمت ,, أحرم اذني من سماعك .,,!
كانت الصورة جميله
كنتي في احلى نفانيفك
كأن الصبح ضيفك ,, أو كأنك من كثر ماكنتي أنتي
كنتي طيفك ..!
كنتي في اكثر مواعيدك وفـــا ..
وكنت أنا .. في أكثر يديني دفـــا ..
كانت الصورة جميلة ..
وكـــــان في الصورة وفــــــــا ..!

فهد عافت