. ليه المسا عـوق الشقـاوي وطبّـه ؟
وليه الهبوب تصحي القلب لا بـات؟
وليه القمر يدعـي جريـح المحبّـه؟
ويقول له يا هيه..ما فات ..ما مـات
جرحك ظهر لو قلت للوجـه خبّـه
وللحزن في ضحكك رسوم وعلامات
وليه المطر بالـذات ريحـه.. وصبّـه
كنّه رسول بين الاحبـاب بالـذات؟
اشتـاق فيـه لـ شوفتـك واتنـبّـه
للي نسيته مـن مواقـف وَ نظـرات
لا استانس الخافق ذكـر مـن يحبّـه
ورجع يراجع فالوناسات مـا فـات
يا مرتـع القلـب الحزيـن ومربّـه
يزيين بك مثل الذهب صدر الابيـات
هيهات ينسى القلب شخـص ٍ لعبّـه
وهيات يدله خاطري منك هيهـات
سبك مديح .. ومدح غيـرك مسبّـه
تقول واذني صوتها تقول لك هـات
ونبع الغلا عنـدك وعنـدي مصبّـه
ومن الولا .. في خافقي لك ..ولاياات
وطيفك حطب عيني..وعيني مشبّـه
والشوق برد ٍ ما انقطع لو للحظـات
ومكانك الصدر و لك القلـب شبّـه
بين الضلوع اللي فردهـا التنهـات
ولك بيرق ٍ فـ القلـب حبـك يهبّـه
شامخ ولا هزه من العـذل غـارات
محبتـك فالوقـت ذا مـا تشـبّـه
الا بخيمـة بـدو بيـن العـمـارات
.