الله على وقت مضى فات ياحسين
وعزي لمن بيض العذارى كونه

ياحسين وين اللي بشوفه يسلين
اللي جعلته للضماير مضنه

عليه من بعد النيا تذرف العين
والقلب ونات الحشا يوجعنه

سود الليالي تلحق البين بالبين
ومابيضنه بالموده محنه

العام عام الود عام المحبين
لوفيه نيران على القلب جنه

واليوم اهل مضمون عيني بعيدين
وسود الليالي عن دياري حدنه

الله لحد .. مافيه حي يعزين
وعلى زمان فات جريت ونه

والحقتها تسعين ونه وتسعين
من عقب ماهي بالحشا مستكنه

ونات من هو طاح بين المثارين
خيل تعدنه .. وخيل وطنه

فرسان ربعه عن مطيحه مقفين
وفرسان ضده شاهرين الاسنه

من فوق قب كنهن الشياهين
في حومة الميدان تشاوحنه

بغا المنير وجو هل الخيل عجلين
والخيل اعاقن نيته واعجلنه


. محمد بن أحمد السديري .