ظِلْ .. ظَلْ
وظِلْ .. راح
هو خطا قنديل ليل .. أو خطيّة هالصباح؟
وما على سورك ملامه .. يا مدينه
ولا علينا
ما شكى غصن المواجع من حمامه
ولا شكينا



**


كلنا فاليمّ .. يا بنت المواني
إفتحّي الشباك .. للما والنوارس
ما لـ هذا اليمّ باب
ولا لـ هذا اليمّ حارس
كلنا وأنتي .. حكايا
ما يلملمها ورق أصفر ..
ولا ليلة شتا
كلنا وأنتي حكايا
بسّ ما ندري لمين
ولا لـ متى ؟


**

المدينه يمّ .. والظلّ النوارس
رفرفت
من ألف حلم
وألف سور
وألف مينا
من لظى التغريب .. من طيش الهواجس
ونفضت حزن البحر كله
بـ يدينا
وما علينا
صدورنا من حدّ غربتنا
حزينه
وإنتي .. إنتي
لو رحلتي من العذاب
ولو سكنتي
مثلك البارح .. وأنا مثلي أنا
ما قدرنا نكون غير
غصن ما ودّه يجفّ
وطير ما ودّه يطير
ما قدرنا .. يمكن
أو يمكن نسينا
ما علينا