ما أبى شيء ..
بس أبى ترجع ثاني ، وأعيش عمر معك ، نختصره ف يوم ..

وإذا خلص اليوم ، مستعده أروح معاك لـ وين ماتروح ..
ماتفرق معي .. وأكيد ماتفرق معك ..
بس ماعاد فيني اتحمل هالعمر بدونك أكثر ..

مابي شيء ..
بس أبيك ، ..
ابيك شوي ، لو ممكن ..!
ابي اوشوش لك .. افضفض لك .. وتضحكني واضحك لك ..
بس ابيك
تسولف لي بهالبرد ..
تقولي قومي شبي الضو معي ..
ونسهر سوا ..
ونسمر ..
ومايقطعنا إلا صوت أمي ..
وهي تنادينا ..
ياللا ناموا .. ماتعبتوا ..
أمي اشتاقت لك ..
حتى هي .. ماعاد تتحمل هالعمر دونك ..
لكنها تصبر .. وتتصبر ..
هي اقوى .. دايم تردد .. اللقا عند رب العباد ماهو بين العباد ..!

ماابي شيء .. بس ابيك الليله جنبي ..
تسهر معي ..
تسولف لي عن الجامعه .. ودكتورك .. ومشاريعك اللي بتسويها بكره ..
وقولك تشوووفيني بكره .. ارفع راسك ..
واقولك ياخووفي من بكررره .. وكني اعرف
ان بكره بيجي بدونك ..

ماابي شيء ..
بس ابيك معهم .. تكمل جلستهم ..
اخواني لااجتمعوا .. ينقصهم واحد ..
فراغه كبير .. يهد حيلي .. ويكسر نظرتي ..
احسهم شوي ، واحس بلحظه بتدخل وتكثرهم ..!
تكملهم .. ياواحد بغيابه نقص الكون كله ..!

ماابي شيء .. بس أبي لاعديت على أصابعي ووصلت للثمانيه مااحس بالنقص ، وان عدي غلط ، وارجع احسب من جديد .. واوقف عند نفس العدد ، واقول لا لا فيه احد نقص احنا مو ثمانيه احنا اكثر .. وارجع اعد .. ثمانيه / انا .. وخلاص ..!
ماابي شيء إلا أني اعد واوصل الثمانيه ومااسكت ،ابي اكمل واقول تسعه أنت ..

ماابي شيء ، بس ابي اجلس جنبك وانت تسوق ، تدور بي على كل البلد .. وارضى منك بكوفي .. مشتاقه لمحمد / عبادي / وغيره معك .. مشتاقه للبلد بحضرتك .. وللعمر بوجودك ..!

ماابي شيء ، بس ابي احتفل بميلادك ، بكيكه حلوه ، وجمعه حلوه ، زي مااحتفلت بهم .. وصرت اعدد نوفمبر .. من فيه بنوفمبر ، واجي ابنطق اسمك لكن ينشل لساني ويثقل .. الا عن قولة مافيه احد بنوفمبر .. وصورتك ببالي تبتسم .. ادري انك ياكل الناس بنوفمبر .. بس رحت وخليتني .. وماعاد به احد بنوفمبر ..!

ماابي شيء انا .. بس ابي العمر معك ..



هذيان عابر من قلب اثقل كاهله الفقد لا اكثر ..
اسمحوا ركاكة الحرف ، قلوبكم تستوعب الاكبر

____________________________________

أطيّر لك حمام البآل وَ أفقد كل ليله سرب ..!*

.