حنّا نتشابه كثير
يا زميل الحب .. والشوق الطويل
وسجن فرقى ..
وأغنية" أطلق يديا"
وسيرة التحرير
كلنا نعشق .. ولكن
من هو فينا يستخير ؟

كبير .. لو كان ظنّك يا رفيقي خاب
ــــــــ ’ منت أول اللي يفيض الشوق لأهدابه
ضوّك طفت ..والشتا عاري بدون ثياب
ــــــــ ’ الأبيض .. اللي جهل بأعداه وأحبابه
حنينك الفاس .. لا همت السهر حطّاب
ــــــــ ’ وأخذت مع كل يابس .. وحشة الغابه
يا طول سيرة هواك الشاحب .. المرتاب
ــــــــ ’ ويا قوّ باسك .. وحيد .. وتقدر تجابه
مثلك ليامن سمع بإن " الهوى غلاب"
ــــــــ ’ يكسر تحت ناب صبره .. كلمة عتابه
الليل حالك سواد .. ونجمه الكذاب
ــــــــ ’ قبلك سرى بي وأنا اللي كنت ما آهابه
أدهم يشابه ضياعه .. وحشة الغيّاب
ــــــــ ’ للذكريات .. لسؤالٍ ما لقى : جابه ..!
تعبت أفتّش بي وأسأل .. وش الأسباب؟
ــــــــ ’ وأتجاهل الجاي .. ولا أحسب له حسابه
يا ليتني ما عرفت أشتاق للي غاب
ــــــــ ’ ويا ليت برد الوله .. ما ضام حطّابه
كبير أنا مثلك .. ولكنّ ظنّي خاب
ــــــــ ’ بالغايب اللي نسى أحبابه على بابه

لا تشعل القنديل
خلّ المدى ظلما
ما عاد خاف الليل
دوّاجه الأعمى