يا هيه إلتفت لي وإسمع دعاي لك يا هيه
ترى عادك بتشبع مـن البعـد وتواجـه
دعيتك بصوت ياصلك ليه ماتوحيه
وانا اسمع ضلوعك من صدى الصوت لجاجه
عليك الفؤاد إخلاجـه مصمـخ راعيـه
خف الله في راعيه ما تسمـع إخلاجـه
ترى العفو قد جاك أوله وإغتنـم تاليـه
وترى الحلم بحرٍ غير لا تآمن أمواجـه
وترى الود ليلٍ مظلـمٍ جيتلـك ساريـه
سراجه وصالك والجفا ينفـخ سراجـه
وترى قصرنا اللي كم سنة نجمع ونبنيه
هوى العذل طيح بابه العـود وسياجـه
لي أيام مدري وين دارك ولا أدري ليه
وأنا خابر إني بـاب شفـك ومزلاجـه
غيـابٍ بـلا سبـة هجـادٍ بـلا تنبيـه
وجفا أغلى العرب نارٍ على الكبد وهاجة
نضج قلبي من البعد وش حاجتك تكويه
جفاك الجمر والصبر في بعدك الصاجه
طبع حبك بقلبي والأيـام مـا تمحيـه
هذا هجرك يحاول يموجـه ولا ماجـه
يموت الأمل لكن ظنـون الغـلا تحييـه
وعروق الوفا فالروح والقلب وجاجـة
خبرتوا حدٍ يبكي علـى واحـدٍ يبكيـه
وخبرتوا حدٍ مسجون ما يبقي إفراجـه
أحبه ولا أبغضته علـى شـيٍ يسويـه
ولا زالت رقاب الرجـا فيـه منعاجـة
عسى منزلٍ ضمه حقوق الوسم تسقيـه
وتضحك له الدنيا وهو يضحك حجاجـه
فقد خاطري شي مـن الضيقـة مسليـه
وغدت روحي من الناس والليل هجاجة
أروح لمكانٍ خابـره .. خابـره يآتيـه
أسوق القدم صوبه وهي مالهـا حاجـة
مكانٍ نزيـه وأول مواجهـي لـه فيـه
وأنا خابرٍ مـا رجـل مثلـه بدواجـة
لعل وعسى ما حدنـي للمجـي يدعيـه
وأشوفه وأنا ما ودي أسبـب إحراجـه
يحب الجريح آخر دروب اللقى ويجيـه
وتحب القدم جيـة مكـانٍ أول مواجـه
ابن فطيس