إقرا الملامح : يائسة
مِتْشجرّه ضيج وضِجر
مِتْهَنْدمه لوّ القَهر
مِتْفرعنْ بهاليوف
بـِ إيدِك صبر ؟
شِبّه فَنر
قَبل لَـ تعوفْ
لنْ انعكاسات الضِّوا
تجذب فراشات النِّوا
واكعد اعدّ حبيّبيني
ويّا الهوا !
هذي لِمْحيميد
وذيج لِبُو اْصْلُوح
والسّكرية امْريمَه


لوين راحو يا تَرى
والسّكه اْمْن أيّةْ ثَرى ؟
هل يا ترى بِِطُّول ؟
و الطّول جَم بِيْطُول ؟
ماريد أَحْجِي ويَاهُم
بس أَجْبِر
بهالعين !
ماريد اشم اشياهُم
الشّم
شَمْ العين


راحو ولا يَطْرون
لو بالحلم يَطْرون
لَجْدِل جديلَة طَرب
واخضّب الجَفينْ
واعوّذ العينين
لا يحسدوني


بيّا حِزن خطّار
يعجِف سوالفهم سِوَا
ويِضِفّني بيها
وانام ويّا الحزن
أوِنْ وهِوّا يوِنْ
متقاسمين الشرشف
جَم مَرّه يلدغني
وما تُوب مِنْ ضِيمَهْ



اشقد استاحشتهم !
قد المسا الْ مَاله قد
والله واحشيني شَقد !
مكدر أَكُول اْشْقَد
صعبَه افجْ الجَف
صعبه أَعَرْف الغيب
باجر يرجموني



مسمُومْ وجهي
مشقق امنْ الجوعْ
مخطوف مايَه
لـَ اْتْجففون العين
وانتمْ هَلي وعيني
ولا اْترحمون ؟
لارحمة لافَد شُكِر
وانتو لفمّي شَكِر
اشلون هَلِي ؟ اشلون عزّي ؟
اشلون ما اْتْذجرون ؟
مرّه اتْذَجِرونا




مرّه

اللهجة على منيرة تجربة أولى +