يوم العذارى باجمل الصوت غنّن=نسيت همي .. واستمعت الغناوي
يا حلو دق طبولهن يوم شالن=والطار صوته في دجى الليل داوي
ما منهن اللي بآخر البيت تلْحن=من يوم شالن .. والقصيد امتساوي
كلن تقول لنفسها صوتي احسن =انا اشهد ان اللي هوى الفن غاوي
شالن ومالن واستهاضن وطربن=وقبل الطرب باعن رهيف الغطاوي
تقودهن سمرا غنوجن تفنّن=حفظت قصيدن ما حفظها ( الخلاوي )
الطار في يدها خطير ايتجنّن=يبكي على الفكّـه ولاهو بقاوي
وعلى يمينه نافل الزين والدًن=غرون لحزّات الطرب صار هاوي
هي منوتي واللي لها خاطري عنْ=عمهوجتن عوده من الزين راوي
في حسنها تخْلف وتتلف وتفتن=مطنوختن تلعب بقلب الهواوي
قالت حداهن .. شوفن الفجر بيًن=قالن .. وعدنا الليل لحدن يراوي
لا تعبت السمرا .. ولا البيض ملًن=محدن يلوم اللي على السهر ناوي
الجوْ طاوعهن على ما تمنّن=ليلة ربيعن ما تجي با المناوي
مثل الخشوف اشكالهن يوم صفًن=حول الغدير وفوقهن بدر ضاوي
زين العذارى غير لامن تجلًن=ومن يجرحنه ما لجرحه مداوي
هن راعيات الكيف والذوق والفن=وهن سبًة جروح الوحيد الشقاوي