الحُضور الأوّلْ مربكْ جداً ,

أنَا وطلالْ وسَاعة الهَذيانْ ,

في كثيرْ من الأوقاتْ نتصورْ أغنيةْ لموقفْ أو العكسْ نتصورْ موقفْ لأغنيةْ , { الله يبعدنَا عن الأغَاني }
وكثيرْ من الأغانيْ تخلقْ ساعةْ هذيَان ومواقفْ كثيرةْ جداً لحالاتْ تخصنّا هذيانياً ,
وكثيراً ما نتعَايشْ مع أغنيةْ لنخلقْ لهَا صورهْ من نسجْ الخيَال , بس المهمْ نعيشْ الموقفْ : )
وفي سَاعة الهذيَان مع أغنيةْ معيّنة ,, يأخذنَا أكثر من سُؤالْ لبعيييد ,


كثيرْ من أُغياتْ طلالْ { الله يرحمه } تحكيْ حكايَات وليستْ فقطْ مواقفْ هذيانيةْ وحسبْ ,
طلالْ { الله يرحمهْ } كانْ صوت حنونْ جداً ,
صوتْ دافئ جداً ,
صوتْ ودودْ جداً ,
صوت شجيْ يجبركْ على الحَالة ,

كانْ في كثيرْ من الإختياراتْ يناجيْ حالاتْ وقلوبْ مرت بذاتْ المرحلةْ واللحظةْ ,
كُنت أتسألْ ساعةْ الهذيَان إلى أي مَدى تأخذنَا !! و لـ وينْ تودينَا !!
ولأيْ شعورْ !!
ولأيْ مكَان !!
ولأي ذكرى !!

حتى وإنْ كانتْ خيالاتْ ,

كثيرْ من أُغنياتْ طلالْ تأخذنَا إلى هذه الأبعَاد ,
فإذا كان كلام أغنية يتغنّى بها طلالْ يأخذنَا إلى تلكْ الأبعَادْ ,

إذاً كيف كانتْ الصُوره بالنسبة للشَاعر ؟
كيفْ كانتْ الحالة ساعةْ دندنة الأغنية ؟
كيف كانتْ حالة الفرحْ عندمَا ولد اللحنْ ؟
كيف كانتْ الحالة عندمَا كان يتعايشْ مع تلكْ النشوهْ بتلكْ الوصله
{ نسيتني الأملْ سنين زينَا زي العاشقينْ } صابرينْ صابرين ,

* حاولتْ أن أصنعْ موقفْ لسَاعةْ هذيَان مسكينةْ !

حنون وفيّ يقتلهْ الإنتظَار ,
ويصادفْ وفيّة تقتله جمالاً لإنتظَار ذاكْ اللا مُباليْ !





أذكر في مرّه كنت أحبْ ,
وكانتْ محبوبتيْ توعدني بكثير أمَاني !!
مثل أي أماني كانتْ { كثير منهَا كلام فاضيْ }

وكان من هالأمنيَات إني أشوفهَا ولو مره وحدهْ بس ,
وغالباً تكون خيالاتْ اكثر من انهَا امنيه ,
بعد كثير من الوعودْ اللي حكينَا فيها ,
وبعد كثير من الوعودْ اللي كذبت فيها ,

وعدتني اشوفهَا بعد سنتين ومنّتني فيهَا وفي الحالة اللي راح نعيشهَا على ذاكْ الوعدْ !!
كلامهَا عن الموعدْ كان مره يجننْ ,
كلامهَا كان يعجبني كثير كثير لمّا تحكي عن الموعدْ ,

عشت طول هالسنتينْ على حالة الموعد ,
كنت أسمع صوتهَا كثير ,
كنت أسمع صوت الفرح كثير ,
كنت أشوف الأماني في صوتها ,
كنت أموت من الفرحْ ,
أتفقنَا على موعدْ اللقياء متى راح يكونْ ,
وأنبسطت كثير ,

قربتْ نهاية السنتينْ وقرب يوم الموعدْ ,
أنتهى آخر شهرْ من السنتينْ لاحس ولا خبر !!
وش اللي صَار ما أدريْ !!
ولكن كانْ الموعدْ بيننَا ,
وعدتني وأقسمتْ ما تغيبْ !!



في يومْ الموعدْ وصلتْ !
وجلستْ على كراسي الإنتظَار أمنّي روحي بهالشوفَه ,
علّ وعسى إنهَا تجي ,
أنتظرتْ الساعة الأولى وانتظرتْ الساعة الثانية !!
وعدّت الساعة الثالثة وهي ماجتْ!
قدمت ساعتي ودي يقرّب الموعد !

كنتْ أطالع ساعتيْ وأحسب الدقايقْ ,
ولما رفعت راسي كانتْ مقبله ,
وقفت وطرتْ من الفرحْ في داخليْ ,
وقلت أهلينْ ,
جابكْ الله ,
وافيةْ وجيتي على الموعدْ ,

ناظرتني ,
قالت أنتْ مين !!
سكتْ شوي , مدري شقولْ !
قلت مدريْ !
بس آسف يمكنْ ماكنتي أنتِ ولا كانْ إنتظاريْ لكْ !!
نظره غريبةْ ليْ وقالتْ { مسكينْ الله يرحمْ حالكْ }
ناظرتهَا وهي ماشيه من عنديْ ,
وهزيتْ كتوفي بإنكسَار ,
وقلت بيني وبينْ نفسي طيّب ليه تزعلينْ عليّ هي قالتْ لي بجي !!

رجعتْ وجلستْ وقدمتْ ساعتي ,
انتظرتْ ساعة ونص !

مرتْ علي وحدهْ مدري من تكونْ ,
وقفتْ متردد ,
وقلت أهلينْ ,
أنتِ ع الموعدْ !!
ناظرتني ,
قالت أنتْ مين !!
سكتْ شوي , مدري شقولْ !
قلت مدريْ !
بس آسف يمكنْ ماكنتي أنتِ ولا كانْ إنتظاريْ لكْ !!
نظره غريبةْ ليْ وقالتْ { مسكينْ الله يرحمْ حالكْ }
ناظرتهَا وهي ماشيه من عنديْ ,
وهزيتْ كتوفي بإنكسَار ,
وقلت بيني وبينْ نفسي طيّب ليه تزعلينْ عليّ هي قالتْ لي بجي !!

رجعتْ انتظرْ ,
مرتْ علي وحدهْ مدري من تكونْ ,
وقفتْ ,
متردد , متلعثم , خايفْ , زعلانْ , طفشتْ من الإنتظَار !!
وقلت أهلينْ ,
قالتْ أهلينْ ,

قلت أنتِ ع الموعدْ ,
ضحكتْ ثُم سكتتْ !!

قلتْ لهَا آسفْ بس أنتِ ع الموعدْ ؟
طالعتني وبخاطرهَا شويتْ حزنْ !

قالتْ أي موعدْ ؟
سكتْ مدري وش أقولهَا !!
امممم

قلتْ اللي قبلْ سنتينْ !!
ضحكةْ وقالت سنتينْ !!

هزيتْ راسي وقلت إيه ,

قالتْ أنتْ من متى وأنت هنَا ؟
من متى وأنت تنتظرْ ؟

قلتْ صار لي ساعاتْ ,
سكتتْ وانَا سكتْ ,

حبيت ألطفْ الجو قلتْ لهَا بإبتسامةْ بس ماجَاتْ : ) !!

ضحكةْ ونزلتْ دمعه من خَاطرهَا وقالتْ
اجلْ ساعاتْ !!
وضايقْ علشانكْ إنتظرت ساعاتْ !!

انا صارْ لي 4 سنينْ أنتظرْ !
تخيلْ !!!

والله إني على الموعدْ ,
والله إني مثل ماقلتْ ,
والله نفس الأمانيْ اللي رسمتهَا لهْ ,
والله مثل ماوعدتهْ

حتى لبسيْ ياصقرْ والله نفسْ اللبس اللي وعدتهْ !
والله ما أبي شي غيرْ إني أطيّب خاطريْ من ذاكْ الوعدْ !
والله ما أزعلْ منه لو يجيْ ,
والله بس يجي بعاتبه ,
بقوله ياقلبْ روحكْ وينكْ !!
ياقلب روحكْ انا انتظركْ !!
ياقلبْ روحكْ طوّلت , طوّلت حيييييل !!
أشتقتلكْ ,
ياخي وينكْ !!
موب حرامْ عليكْ !!
طيب قلّي إذا بتتأخرْ ياقلبْ روحكْ !

والله ما أبي شيْ ,
بس يجي بذكره على لونْ الموعدْ ,
بذكره انه طلبْ مني ألبسْ الساعة هذي !
بذكره انه طلب مني ألبسْ السلسالْ هذَا !
حتى ضحكتيْ والله كانتْ غير شكلْ على شانْ خاطر عيونهْ !
والله ياصقرْ ماعاد أبي شي والله !
بس ليه كل هالأمَاني , ليه !!
ليه كل هالإنتظَار !!

تصدقْ عمري وقفْ ع الواحدْ وعشرينْ من ذاكْ اليومْ !

تصدقْ ياصقر وعدني لما أشوفهْ بيقولي وش ألبسْ في زواجْ إختيْ !!
تصدقْ حتى قاليْ بختارْ لك تسريحة شعركْ !!
تصدق قالي بختارْ لك عطركْ !!
كان يقولي أبيكْ تكونينْ زينة الحفلْ !!
كانْ يقولي أبيكْ تكونين فتنة الحفلْ وكنَا نضحكْ !

وينهْ !!
قلي وينهْ !!

لا لبسْ لا تسريحةْ لا عطرْ لا حفلْ لازينه !!


تصدقْ كل شي كان يمنينيْ فيه !

تصدقْ وعدنيْ لمّا نسكنْ بيت جديدْ يختارْ لي لونْ غرفتيْ !
تصدق وعدني يختار لي أثَاث غرفتي !

من ذيك السنةْ رحنَا بيتْ جديدْ ,
تصدق الغرفة مابعدْ سويت لهَا لونْ !
تصدقْ لحد الحينْ انتظرْ هو يختارْ لي لونْ غرفتي !
تصدق حتى مكتبتي الصغيرة ما رتبتهَا !
الكتب مرميه عليهَا لحد الحينْ !
وحطيت الأبجوره ع المكتبةْ بس لينْ الحين ما اشتريتْ لهَا لمّبةْ ,
تصدق لين الحينْ ما رتبتْ غرفتيْ !
تخيلْ !!

تصدقْ كل هذا علشانْ خاطر الموعدْ !
بسْ وش تبني اقولْ !
هذا انا صابره عسَى يحّن ويمر الموعدْ ,


كسَرَتْ خاطري ونسيتْ موعديْ انَا ,
وبديتْ أرددْ بيني وبينْ نفسي وهمْ والله وهمْ كل المواعيدْ وهمْ !

قالتْ وش فيكْ تغير حالكْ وتغير موعدكْ وتغيرت إنتظاراتكْ !
انا من 4 سنينْ أنتظر ولحد الحينْ أنتظرْ !

سكتْ !
وماعدتْ أتحمّل !


مشيتْ من عندهَا وانَا اطالعهَا ولفيتْ وجهي وانا شفقَان عليهَا حييييلْ ,
وقلتْ لهَا { مسكينةْ أنتِ الله يرحمْ حالكْ } !!!

قالتْ لي صقرْ ,
قلتْ لبيه !

قالتْ تعرفْ وش كانْ يقولْ طلالْ الله يرحمهْ ؟
وقفتْ بعيدْ عنهَا وقلت لهَا لا !

قالتْ بقولكْ بس وانت طالع الحينْ مر وأسأل على طلالْ أغنية { صابرينْ }
كانْ يقولْ { ياللي وعدتْ القلبْ هناهْ ليه تنساهْ } ليه تنساهْ !!
صدقني راحْ تختصر لك مسَافاتْ ,
صدقني راحْ تعيشكْ بفكرْ ثانيْ وذكريَات حلوه للموعدْ ,
على الأقلْ تذكركْ اللي دارْ بينيْ وبينكْ !!

طالعتهَا ......... فراغْ ,
قالتْ روحْ الله يسعدكْ انا باقيهْ هنَا راح أنتظرْ علّ وعسى يصدقْ بوعدهْ !

قلتْ لهَا { عسى ربيْ يرحمْ حالكْ }
وداعتكْ ربي يا إنتظَارات العُمرْ ,







صابرينْ ويقولوا الصبرْ جميلْ ,
صابرينْ ويقولوا الصبر طويلْ ,
شايلين في قلوبنَا الجرحْ ,
ناسيينْ الهناء والفرحْ ,
نستني الأمل سنينْ زينَا زي العاشقينْ !
صابرينْ .. صابرينْ ,

.
.
ياللي وعدتْ القلبْ هناهْ ليه تنساهْ ليه تنساهْ !!
ياللي رضَاك كان أغلى مناهْ ,
وين ألقاه ,
كيف ألقاه ؟
عمري ليَالي , ليالي سهرهَا عذابْ ,
خلّا أمانيْ لـ فرحيْ سرابْ
نستني الأملْ سنين زينَا زي العاشقينْ
صابرينْ .. صابرين ,

كلامْ لأشخاصْ ما اعرف مينْ !
كلام خارجْ عن الإرادهْ !
كلامْ حالة في ساعةْ هذيانْ !
كلام خارجْ عن قانون الكِتابة وأركانهَا ,
كلامْ يمر بالخَاطر لا أكثرْ ,

الكلامْ مايعني أي شيء غيرْ أنه طلالْ الله يرحمهْ أبدعْ في هالأغنيةْ ,
وهالمسَاكين اللي فوقْ كتبتْ عنهمْ ذبحهمْ هالإنتظَار : )

لـ روحكْ وإسمعيهَا بعيونكْ ,
سامحيْ الـ 4 سنينْ اللي أنتِ إنتظرتي فيهَا !
و يمكنْ يجي !!

يقولْ الحميدي الحربيْ :
{ يمكنْ بعد يومينْ ويمكنْ بعد عامْ ,

نفسه تحققْ في هواهَا رجاهَا ,

أو يمكنْ تضيع الحقايقْ بالأوهامْ ,

وتبيعه أيام(ن) بعمرهْ شراهَا , }

ودّ ,
يعطرْ هالمكَانْ ,
وداعتكمْ ربي ,